Paano ba dapat sinisimula ang mga
bagay-bagay, halimbawa ang simpleng pagpapakilala? Sa isang tanong ba? Sa paglalarawan mo kung
sino ka at pagsasabi ng mga bagay na pinaniniwalaan at di mo pinaniniwalaan? Sa
pagsusuri ng kung anong nasa paligid mo, at kung ano ang mas interesado sa
kanila o sa’yo? Sa pamamagitan ba ng pagsunod at pagsagot sa mga tanong,
alintuntunin, batas, direksyon at kung anong bigla mo na lamang maisipan?
Kahit ano siguro pwede at maaring
maging tama, basta alam mo kung bakit mo yun ginagawa? Pero bakit nga ba
kailangang mong magpakilala? Bakit kailangan mong magsalita, sumagot, gumalaw,
tumalon, gumulong, at gawin ang trip mo? Kasing tipo ba yan ng Purpose Driven
In Life, onipiliP agm gna orbiL gn asabgaM datgilaB tikaB, Saan darating ang
Umaga, Kahit Puso’y Masugatan, Where Do Broken Heart Goes?
Ano sa tingin mo, kasi kung ako
ang tatanungin, marahil nag-uumpisa ang lahat mula sa matanong na isipan ng
bawat tao? Ngunit kaakibat ang bawat tanong ay ang kadahilanan kung bakit
kailangang masagot. Ibig sabihin ang bawat tanong ay may kadahilanan, at ang
bawat kadahilan ay dapat may tanong?
***
SUMMON, panawagan na nangangahulugan
ng kadahilanan, pananagutan o pwede ring silbe. Naniniwala ako na ang lahat ng
bagay ay lumilitaw at lilitaw ng may kadahilanan, maaring hindi mo matanto ng
agaran, pero nakakasiguro ako na walang bagay na wala lang. Lahat tayo ay
nananawagan na matanggap, marinig, makilala o sa simpleng marespeto.
***
Summation of Moments, una kong
natutunan yan at naintindihan ng College ako sa isa sa mga major subject namin
(Engineering Mechanics). Nangangahulugan ito na ang bawat mga bagay ay dapat balanse.
The summation of moment is equal to zero, kaya kapag hindi mabalanse ang
buong equation, malamang sa malamang may mali kang ginawa, o may sinama at di
naisama na variables.
Sa madaling salita, kung bakit
merong ikaw at ako, tayo at sila, kami at kayo, ay upang maibalanse ang mundo.
Nasaang panig ka man, mananatiling ikaw ay may halaga sa patuloy na pag-ikot ng
mundo. Kaya kahit anong gawin mo, hindi mo pwedeng sarilining ikaw lang ang tama
at lahat ng karapatan ay nasa sa iyo.
Balanse ang mundo, nakatagilid
man ito para sa iba, nananatili itong nasa balanseng katatayuan. Ang mahalaga,
malinaw sa’yo kung nasaang panig ka, mag-iiba iba ang panahon, mag-iiba iba din
ang paniniwala mo, pero ayos lang yan kasi alam mo sa sarili mong may buhay ka
pa gumagalaw, nag-iisip, naghahanap ng silbe, natatanong, sumasagot, lumilikha,
nangwawasak.
Kaya lagi mong tatandaan, ano man
ang gawin mo, may makikita at makikita kang sasalungat sa ginagawa mo. Kase nga
hindi lang ikaw ang babalanse ng mundo.
Ayos!
TumugonBurahin