Kamatayan Ko Ngayong Gabi

YAKAP - Kapag sukdulan na ang sakit na nararamdaman mo, naghahanap ka ng mga alaala ng iyong kamusmusan. Kung saan ang bawat pagluha at kirot ay panandali lamang, kasing bilis mawala sa simpleng pag-ihip sa tuhod mong nasugatan. At ang bawat mga dahilan ng iyong pagluha ay madaling napapahid ng matatamis na kendi. Ngunit ngayon, paano nga ba ang paglimot sa katotohanang hindi sana dumating sa buhay mo. (Photo by: Marc Rusell / Caption by: Arem Cesar)

Tikumin mo ang aking labi
ng mapagkunwari mong halik.
Sapagkat ayoko ng huminga
sa mundong wala ka.
Aliwin mo ang aking utak
ng mga nakakakiliti mong salita.
Sapagkat ayokong maalala
ang sandaling wala ka.
Paralisahin mo ang aking katawan
ng haplos mong may halaga.
Sapagkat di ko na nais pang
mahawakan ng iba.
Patayin mo ang puso kong
umiibig at nagnanais sayo.
Sapagkat napapagod na ako,
namabigo at maglaro.
Ngayong gabi sa paglisan mo,
nakikiusap ako!
Itakda mo ang kamatayan ko sa piling mo.

Tag-Ulan sa Ilalim ng Dahon ni Comrade

BAKasaKALI

INDAK - Makailang ulit mo na bang sinamo, ang isang bagay na wala ka? Ilang beses na rin bang ginaya mo ang galaw ng iba, para lang mapansin ng taong laging sa iba nakatingin? Makaila na nga ba, hindi mo na maalala dahil nakasanayan mo na sa dalas mong pinaniniwala ang sarili mong, ikaw siya-walang pagod sa pagsayaw sa saliw ng tugtugin nyang di kayang sabayan ng iyong paa (Photo by: Marc Russell / Caption by: Arem Cesar).

Hindi ako maganda
tulad ng mga rosas.
At di kasing hinhin
ng iyong nais mahalin;
Di matamis
ang aking mga dila
at mariringgan
ng magagandang salita;
Di mo ako mararamdaman
katulad ng hangin
na kayang humalik
sa iyong mga pisngi.
Naisin man ng puso ko
na yakapin ka sa tuwina,
Ito ay di maari
pagkat mahal mo ay iba.
Subalit katulad ko ang bituwin
Na lagi sayong nakatingin.
Tulad din ng bato
Na pwede mong tiisin.
Ganito ako.
Nandito ako.
Malayo ang distansya
Mula sa’yo.

Tag-Ulan sa Ilalim ng Dahon ni Comrade

T.A.K.A.s

PIGIL - May mga pagkakataong kailangan mong takasan kahit panandali, upang malimutan ang kirot na lumulugmok sa'yo sa kawalan. Ninanais mong burahin ang bawat larawan, lugar, petsa at anu mang bagay na makakapag papaalala sa'yo na may kahapon kang nais takasan. Ngunit kahit gaano ka man katagal pumikit, umaalingawngaw sa kasuluk-sulukan ng isip mo ang lakas ng pagtibok ng puso mong ayaw lumimot. (Photo by: Marc Russell / Caption by: Arem Cesar)

Inaasam kong liparin ng hangin
papalayo sa mundong ginagalawan ko
at mapadpad sa lugar na masaya
ngunit wala ang iyong mga tawa.

Sinasamo kong liparin ng hangin
sa katahimikang di ka masasambit
at kwentuhang wala ang alaala
mong nakapananakit.

nais kong liparin ng hangin.
iyon ang hinahangad ko.

at nawa'y tuparin ng pusong ito.

Tag-Ulan sa Ilalim ng Dahon ni Comrade